فرّحهم هو موقع خدمي هدفه الرئيسي ادخال الفرحة عقلوب أهلنا بالبلد وتخفيف الضغوط الصعبة اللي عم يتعرضولها يومياً

بهالأيام الحاجة كتير كبيرة لمساعدة أهلنا اللي جوا البلد وللأسف البعض عم يستغل حاجتك لمساعدة أهلك عن طريق طلب اسعار خيالية وبأضعاف الأسعار الأصلية, ومن هون أجت فكرة فرّحهم ليكون وسيلتك الآمنة لتفرح أهلك وحبايبك بأسهل طريقة وأفضل أسعار بإذن الله

لنكون شفافين أكتر , أكيد الأسعار ما حتكون متل الأسعار بالبلد بالضبط بحكم أنو حينضاف عالأسعار زيادة رمزية بتتضمن تكاليف متعددة متل الرسوم البنكية عالدفع الأونلاين وفروقات العملات وتكاليف تحويل الأموال للبلد مع تكاليف تأمين المواد وتقلب الأسعار  الغير طبيعي بالإضافة لأجور رمزية لفريق القائمين على الموقع بالبلد ومصاريف نثرية تانية, لهالسبب أكيد حتلاقي فروقات بسيطة بالأسعار, مشان هيك اذا عندك طريقة تحويل أموال للبلد وحدا يلبيك ويأمن طلباتك لأهلك مننصحك تعمل هيك لأنو أكيد أهلك أحق بكل قرش حتدفعو

بالنهاية لازم تتأكد انو فرحهم ما تأسس ليكون مشروع ربحي وليتم الاعتماد عليه كمصدر دخل للقائمين عليه, فرحهم الهدف منو خدمي انساني بالدرجة الأولى

وعن طريق نشر فرحهم بين معارفك حتساعدنا نلبي ناس أكتر وبالتالي نخفض أسعارنا أكتر وأكتر